【食大閘蟹必睇2022】一文學懂食蟹配酒注意事項 | 花雕、雪莉酒、波特酒、黃酒、日本清酒，邊款酒至夾？
#大閘蟹配酒 首要識分公乸
要搵出同蟹絕配既酒，首先要識分蟹公蟹乸，因為公蟹同雌蟹既風味其實截然不同，而登場次序亦有先後。
俗語話「九月圓、十月尖」——每逢農曆九月，母蟹體內既蟹黃滿瀉，蒸熟後就見橙紅爆漿，食落啖啖滿腔甘甜，口感卻像咸蛋黃，滋味一試難忘，因為蟹黃帶甜香，適宜飲用帶甜味的酒配合。
到左農曆十月，輪到肥美肉厚既公蟹出場。公蟹雖無「蟹黃」，卻帶有滑溜晶瑩的白脂(蟹膏)，甜味少但入口鮮滑無比，蟹肉肥美，配襯酒身醇厚、不甜甚至帶微咸既酒，可提升蟹既鮮味。
#大閘蟹配酒Key Point
1. 公蟹的蟹膏比較軟滑而不甜，選酒應以中等以上酒體、不甜或少甜既白酒主打；至於中等酒體而富甜蜜的白酒，同甜美既雌蟹更相襯；
2. 偏甜的白酒如Riesling、Moscato雖然唔係主流，但配搭雌蟹往往有唔錯效果；
3. 大閘蟹鮮味突出，同酒中既丹寧(Tannin) 會互相衝突，應避免紅酒( 經長久陳年的除外)，而太乾身既Champagne也不適合；
4. 近年興起以清酒「古酒」及「貴釀酒」配大閘蟹，效果令人驚艷，值得一試。
紹興花雕 大閘蟹既「天作之合」
紹興花雕，一直被公認為配大閘蟹既王道。花雕其實係黃酒既一種，以糯米釀造為主，從最乾到最甜又可分為元紅酒（乾型）、加飯酒、善釀酒及香雪酒（最甜）。當中，花雕就是經陳年既「加飯酒」，屬於半乾型。
紹興花雕唔只令蟹黃更鮮甜，更可以中和蟹既「寒涼」，絕對係Perfect Match。花雕醇厚芳香而口感柔順優雅，二十或三十年陳酒，能突顯蟹的鮮味。很多人食大閘蟹會點蟹醋，味濃帶甜亦帶酸，跟大部分葡萄酒或烈酒都不配，而花雕酒卻可以完全匹配。
蟹后 x 甜酒 Sweet wine
蟹乸的精髓當然係甜美既「蟹黃」。由於蟹黃帶甜香，適宜飲用帶甜味既酒配合。如果Budget充裕，配搭來自法國Sauternes、味道複雜紛陳既貴腐甜酒可能會震撼你既味蕾，但其實清脆甜美既Riesling和Moscato往往有令人驚喜既效果。
對於蟹肉微妙既鮮甜口味來說，配酒過份甜膩可能會掩蓋蟹既味道。選擇Riesling中甜度較低既級別Kabinett或Spatlese，微甜口感同大閘蟹搭配恰到好處。
Sherry雪莉酒 x 蟹粉系菜色
吃體型較大的公蟹，蟹膏多且肉香滿溢，搭配酒精度略高既酒最為合拍。西班牙雪莉酒係一種強化酒（Fortified Wines）——即發酵後會加入烈酒增強烈性。
雪莉酒有很多不同風格，當中Amontillado或Palo Cortado雪莉酒，略帶鹹香，酒精達20度，口感乾身，充滿橄欖、杏仁、甚至散發出蝦米、金蠔等咸香氣息，同大型公蟹係絕配。
至於Oloroso酒體沉實豐滿，特點係焦糖、西梅乾果味道，酒精度更高，配搭大閘蟹時可以混合陳醋；而配搭蟹粉系既菜色，效果出奇地襯！
Tawny Port茶色波特酒 x 鮮甜蟹肉
海鮮配紅酒，有常識都知係NO。不過葡萄牙出產既Tawny Port卻係例外。波特酒是一種加烈帶甜既紅酒，種類風格多元，當中，陳化超過20年或以上既Tawny Port或舊年份Colheita Port，由於單寧已經醇化，風味上係極其複雜的氧化滋味：複雜的乾果、焦糖與堅果的滋味，天然油脂的鮮味，唔單止巧妙避過左同蟹鮮味既衝突，相反呢種層次感仲積極調動蟹肉肉質的鮮美。
【相關閱讀】 哈囉❗波特 - 十道問題秒懂⌚Port Wine
Vin Jaune 法國黃酒 x 公蟹
法國黃酒係一種氧化酒。它不如一般紅白酒有著濃郁既果味，卻散發著乾果、堅果、木桶、煙薰、甚至有點咸香既氣息，因為酒味強烈，酸度低，齋飲既話味道不算討好，有人會覺得很「寡」；相反當法國黃酒遇上鮮味四溢既蟹黃，卻會產生奇妙既合拍效果！
無論蟹膏或者蟹黃，鮮味都十分「霸道」，加上質感creamy，會留喺口腔良久不散，一般葡萄酒既果味、酒精感好容易被鮮味完全掩蓋，偏偏黃酒酸度低酒味強既黃酒，不但可駕馭Umami，更可令蟹膏的鮮甜更突出，係一種對比式既food pairing。而由於黃酒酒體醇厚，口感Dry又帶點咸香，配搭公蟹會為適合！不過，如果食蟹配Vin Jaune既話，就不要點醋了。
Sake 清酒 最in配搭法
清酒既配餐能力，喺各種酒類中名列前茅。
近年就興起用清酒來搭配大閘蟹，不僅去除左蟹既腥味，又能將其鮮甜完美激發出來。清酒有獨特既鮮味(稱為旨味)，當中以純米酒、本釀造既旨味更豐富，「旨味」與「鮮味」堆疊，互相加持，係一種神奇既協同效應！
清酒中又以「古酒」配大閘蟹最普遍，經陳化3年以上既「古酒」帶有乾果、拖肥及輕微氧化既味道，配搭效果有啲似花雕，畢竟兩者都係以穀物作原料，但「古酒」既純淨度及醇鮮米味，比一般花雕更強。以3至5年既古酒就可以完美配搭「雌蟹」蟹黃，如果想配搭充滿蟹膏既「雄蟹」，不妨試下10至15年既古酒。
想更奢華更潮？不妨試下用「貴釀酒」配大閘蟹。
「貴釀酒」係日本最古老(平安時代已有記載) 既釀酒方式之一，古時貴族同皇室飲既酒，做法係以清酒作仕込水釀造，因此顏色呈琥珀色，味道香甜濃郁，陳化幾年就有30年花雕既感覺！
風味上「貴釀酒」濃縮感重，完全可以駕馭重油脂、偏甜膩既菜色，搭肥美甜香、又富質感既蟹黃，境界妙不可言！簡直有種穿越時空，返回平安時代既感覺。
大閘蟹配酒 TOP 酒款推介
越洲家釀10年白瓷瓶│
使用上等糯米、小麥、麯及鑒湖水，於深秋至初春全人手製造，於釀製過程中加入少許以純米釀造的白酒加以發酵，令此家釀酒味帶甜，經過10年儲藏期才勾兑入瓶。酒味醇厚，芬芳馥郁。加暖後與中菜配搭效果極佳，宜配搭濃味菜式，例如以紅燒作料理方法的菜式，大閘蟹等。
越山仙雕25年│
來自紹興縣東方釀酒有限公司的越山仙雕，用上糯米、優質小麥以及鑒湖湖水，全人手古法釀製，存放於攝氏十五度及百分之七十相對濕度的山洞內自然發酵。以泥封存廿五年的陳酒，酒色琥珀，芳香幽雅，入口清爽帶微甜，不僅襯大閘蟹，襯其他香甜味濃的中菜、甚至石斑及和牛都極佳。
Kopke Colheita Port 2008│Shop Now
歷史悠久的柯普克酒莊（Kopke）酒莊建立於17 世紀，是波特酒（Port）最古老的品牌之一，至今依舊是波特酒的標杆，尤其以年份茶色波特酒（Colheita ）著稱，並只在極佳年份推出。
此2008年份Colheita Port散發出乾果、香料氣息，漿果風味，口感豐厚帶甜美葡萄柚味道，適合同芝士、朱古力配搭，其甜度可中和帶辣中菜，也可配中式甜品，如湯圓、芋泥、紅豆沙等。
