2019年起香港終於有自己嘅Gin酒啦，自此喺世界烈酒界開始出現我地熟悉嘅名字！

每個本地氈酒品牌嘅背後都有深刻故事同理念，以酒為記，留下香港最值得記念嘅一面。

帶大家一一細看～

喺香港本土氈酒發展成熟之際，其實已經經歷緊好多變化，你又知幾多？

白蘭樹下 珍惜

白蘭樹下團隊透過酒嚟記錄香港既故事，選用白蘭花同當歸等帶有香港回憶人情味道嘅材料造酒。

佢地其中一種主要材料係十五年陳皮，指定購自香港一間歷史悠久既海味店，同昌海味。

2022年2月，因業主收舖，同昌海味光榮結業。行業式微下，懷舊味道同人情味，仍然保留在會講故事的酒液之中。

無名氏 匠心

香港不乏匠人，無名氏以兩人團隊營運，憑住對氈酒嘅熱愛自學、實驗、設廠，成就本地烈酒代表作。

對味道嘅追求並無界限，同本地茶啡氈酒名店「Rest Coffee Gin」，以茶為主題創作Catnip Gin。

好多氈酒都有加入茶葉，Catnip系列將選茶同蒸餾前開茶嘅手法鑽研到極致，充滿信心地只以四種材料製作氈酒，簡單就是美，最純粹地表達茶香氈酒嘅美妙。

福興氈 異客

以銅鑼灣福興里為酒標設計靈感嘅福興氈，喺英國曾經被要求改名！

福興里英文名係Fuk Hing Lane，酒廠設計時考慮譯名同粗口類似，於是將Fuk修改，命名為Fok Hing Gin。

不過喺英國依然俾人投訴名稱有冒犯，要求酒商改名，最終監管機構要求修改背標內容。

獨在異鄉為異客，或者呢啲就係文化差異～不過萬勿錯過福興氈呢款美味傑作，13種材料中有啲喺上環老字號專門採購架！

Two Moons 互助

Two Moons對本地材料情有獨鍾，由試作型到推出第一支氈酒都有一半材料選自亞洲。

發掘香港在地材料亦有一手！同樣造氈酒常見嘅柑橘，唔用檸檬、橙同西柚，特別選用上水農場嘅四季桔，味道清爽充沛，一試難忘！

喺疫情期間曾經協助製作酒精消毒劑。亦喺酒廠只能容納一部蒸餾器之下，依然努力設置廚餘機，一直將蒸餾殘渣變成肥料，送俾天台農場施肥。

所謂互助，不論能力規模，總有方法。