釀酒界的文藝復興 祟尚天然無添加的橙酒 (Orange Wine) 

Josko Gravner︰「我並不反對進步。電腦與飛機，我同意這都應該存在。他們運作得更好，我就更開心。可是，不像電腦，葡萄酒的終點是在人的胃，沒有科技的需要，僅需好好地尊重自然。」

近年來橙酒既地位同人氣持續上升，逐漸成為愛酒人士既新寵。顧名思義 「橙酒 」應該係「 橙」 釀成既酒？如果大家咁諗，就成功俾佢個名fake左??。

「橙酒 」既命名同食得既「橙」無乜關係，純粹因其酒色。最先喺2004年英國進口商David Harvey提出「橙酒 」呢個名。咁點解橙酒會係橙色？因為橙酒係以釀紅葡萄酒既方式去釀白酒——將葡萄連葡萄皮一齊釀，盡量萃取白葡萄皮中既顏色、丹寧(Tannin)同其他物質，咁釀出來既酒就會好似晚霞咁靚既深橙色調！

雖然「橙酒」呢個名係呢十幾年先發明，但原來早喺5,000年前既高加索地區，即係依家既格魯吉亞(當地稱為Amber wine琥珀酒)，已經有人釀緊「橙酒」。佢地將葡萄、皮同籽一齊放喺埋藏土裡面既陶罐(Qvevri)中浸漬發酵長達8－9個月，唔去干預發酵過程，亦唔會澄清同過濾，如此浸漬得來既酒，酒色、香氣、味道以至抗氧化能力都非比尋常。呢種「貼近天然」既Qvevri釀酒技術更被聯合國教科文組織認定為世界非物質文化遺產。

上世紀90年代，意大利釀酒師Josko Gravner深受Qvevri釀酒技術啟發，喺自己既酒莊大膽摒棄全部先進釀酒設備，從格魯吉亞引入Quevri古法釀造橙酒。

從酒界最前衛、最相信科學既釀酒師，一下子變成最老派、崇尚天然既綠色份子，Josko喺短短幾年時間內就證明呢條係正確既路，一連推出Anfora系列幾款橙酒，喺市場大放異彩，掀起歐洲葡萄酒界既「橙色革命」；而差唔多同一時期Stanko Radikon亦發佈自己既橙酒，後續影響無數酒莊，如Franco Terpin，Paolo Vodopivec等等，熱潮傳至鄰近既斯諾文尼亞、奧地利、克羅地亞、法國、遠至美國同澳洲。

橙酒喺風味上大多帶明顯既酸味同石榴、橙皮、堅果既香氣，不妨感受下佢果種好raw好「天然」既味道，到底係「超正」定係「奇葩」，請親自品嚐後才判斷吧。

自然酒 憑甚麼成為熱潮

或者你仲未飲過，甚至對「自然酒」茫無頭緒。但無可否認，「自然酒」既熱潮近年已經從日本、英國、法國、澳洲蔓延至世界。NOW就用兩分鐘睇下「自然酒」懶人包！

點樣理解「自然酒」？退一步諗，莫非其他酒都係「非自然」嗎？

首先我地要認知，即使係「最不自然」既葡萄酒，相對市面上其他包裝飲料都更「天然」，只係「自然酒」更天然。簡單講，「自然酒」就係就係盡量減少人為干擾——種植葡萄時少干預、發酵時使用自然酵母，釀酒時不添加二氧化硫，裝瓶前不過濾……無錯，就好似以「素顏」見人一樣，務求反樸歸真，釋放土地靈魂 。因為呢派人相信，大自然本來就充滿能量，作為人類唔應該「自作聰明」，去做啲「人定勝天」既傻事。

當然，「天然酒」唔單止係炒作「綠色」概念。究竟佢有咩咁巴閉？係咪好飲啲？留返下次再詳細講解吧！

不過就順便提一下，DRC（羅曼尼康帝）、人稱阿婆既Leroy仲有好多勃艮第著名酒莊都係「自然酒」，有佢地做模板，憧憬都係自然既。