日本清酒既種類時至今日可以高達2.1萬種，每次都要諗到底邊支先好，真係諗到頭都爆埋。隨住每一年既改變，所用既米，精米步合，風味等等都會有所唔同。不過到目前為止都可以根據呢四大類黎選擇自己心儀既清酒款，「薰酒」，「爽酒」，「醇酒」以及「熟酒」。姐係好多人所講既「薰爽醇熟」。聽書啦喎：
【薰酒】くんしゅ Kunshu
呢款清酒聞落去果味香到爆，飲落清清淡淡就係佢既特徵，適合凍凍地咁飲，10-15度左右就最適合。
食物配搭：唔係好適合太重口味既野食，例如泡菜同芝士，刺身🍣或者天婦羅🍤之類就最適合不過！
香港小食選手可以選擇翻豆腐花，桂花糕，雞蛋仔，口水雞之類，諗起就正🤤
【爽酒】（そうしゅ）Soushu
呢款清酒猶如字面意思，飲落清清爽爽，收尾會比較清脆。呢款酒喺5-10度左右飲就最好不過，真心飲落會爽到爆。
食物配搭：呢個酒款幾乎最百搭架啦，又可以配搭清爽啲既野食，又可以配搭比較濃郁既野食。
香港小食例如蝦餃燒賣之類既點心，生菜魚肉，魚蛋呀，童年回憶既涼拌烏冬，串燒等等都可以一試架。
【醇酒】（じゅんしゅ）Jyunshu
醇酒飲落去會比較濃郁，濃濃既旨味係佢既特徵，飲得出都走唔甩係醇酒架啦。通常香氣會比較豐富，酸酸苦苦既味會喺你口腔入面任意揮霍。醇酒比較適合熱飲，40度左右，冬天飲再配熱食會開心啲架。
食物配搭：通常都係啲濃味啲既野食。
配有芝士既嘢都唔會衰架啦，例如芝士撈麵，芝士薯條，芝士薯角，臭豆腐，或者韓式炸雞之類。
【熟酒】（じゅくしゅ）Jyukushu
通常清酒都會係透明色，但係如果陳年過既清酒就會係偏向琥珀色啲，熟酒無論香氣定味道方面都會比其他酒款濃郁，好多時都會有乾果或者香料之類比較熟啲既味，或甚乎你會品嚐到花雕味添，旨味相當豐富。如果你唔想啲味咁強烈其實都可以凍飲既。
食物配搭：雞腎，牛雜，豬潤之類，最意想不到既配搭，其實都可以諗諗佢架。
介紹完咁多配搭，唔知你會唔會都想試下呢？其實清酒既發展日新月異，呢四大類方便左大家去唔同餐廳都可以考慮配咩清酒既。咁食物配搭就好個人既～以上可能有啲你會覺得好適合，同時都可能覺得好唔夾，但係都可以嘗試去尋找適合既食物配搭架！
