酒米選用兵庫特A地區嘅東條山田錦，仲有例如愛山或者五百萬石等酒造好適米，獨創嘅製麹法，以及靜岡酵母，令其產品嘅優雅果香味輕鬆配搭多國菜。

昭和末期經歷經濟泡沫爆破嘅清酒界，迎黎嘅挑戰就係同洋酒類產品競爭。當時越黎越多外國餐廳引入洋酒，紅酒威士忌等成為上流產品，清酒變左「old school酒類」。

曾經喺唔同酒類公司做過嘅寺岡社長認為：「如果再唔生產高質嘅清酒，我地就無辦法生存落去。」

葡萄酒界有法定產區嘅概念，例如法國最高級別AOC，而至今清酒都未有。

所以磯自慢嘗試將呢個理念帶入清酒，將秋津東条町嘅田分為｢古家｣｢常田｣｢西戸｣，進行嚴格監管同品質控制，並分別於7月，9月同11月順序發售，數量非常有限。

為左達成同特A山田錦米田農夫嘅合作，即使被拒絕，寺岡社長都不惜花6年時間不斷拜訪，終於取得成果。

擁有最好嘅材料都必須要擁有相對嘅技術，磯自慢投放大量資源捕捉每年酒米嘅差異，從而作出微調。由選米，器材，釀造過程，到銷售，每一步佢哋都處理得無微不至，目的就係為左帶最好嘅品質比佢哋嘅客戶。

自慢(Jiman)喺日文嘅意思係代表自豪，引以為傲。磯自慢對自家造酒技術十分自豪，亦可以喺支酒嘅味道上體現到，佢哋認為就算客戶開左支清酒，一個禮拜內都仍然感受到大吟釀酒嘅味道同香氣變化。